Nagpanugyan si Socioeconomic Planning Secretary kag National Economic and Development Authority (NEDA) chief Karl Kendrick Chua sa kampo ni presumptive president Bongbong Marcos nga i-outline na ang iya nga mga plano kun paano i-dumala ang ekonomiya sang Pilipinas.
Ini agud nga masabat na ang pila ka pagpangalag-ag sang mga investors.
Ginpaathag ni Chua nga natural lang nga kun may paglain sa administrasyon, may kahangawa kag may mga concern ang mga investors.
Ginapahayag nga may yara sang “wait-and-see attitude” ang mga investors samtang nagahulat sa detalye sang mga polisa kag reforms sang incoming president sa nauna nga 100 ka adlaw sa iya pagpungko sa Malacañang.
Ginahulat man kun sin-o ang mangin pinal nga myembro sang bag-o nga economic team.
Kun ma-lay out na ang economic agenda suno kay Chua, mas makahangop ang mga tawo.
Matandaan nga wala pa sang gindetalye si Marcos kun paano sini i-manage ang ekonomiya sang Pilipinas ilabi na bangud trillions ang utang sang Pilipinas nga kinahanglan sabton sang bag-o nga administrasyon.
Ang pila sa naplastar ni Marcos amo ang pagpadayon sang Build, Build, Build program kag mag-focus sa digital infrastructure kag pagpanubo sa presyo sang bugas sa P20 kada kilo.
