𝗪𝗘𝗦𝗧𝗘𝗥𝗡 𝗩𝗜𝗦𝗔𝗬𝗔𝗦 — Ginalantaw sang National Economic Development Authority (NEDA) Region 6 nga wala sang mangin kompetisyon sa tunga sang Western Visayas kag Negros Island Region (NIR) apisar nga naseparar na ang Negros Oriental, kag Siquijor sa Central Visayas; kag Negros Occidental sa Western Visayas.
Ini kasunod man sang pagpirma ni President Ferdinand “Bongbong” Marcos Jr. sang Republic Act No. 12000.
Sa interview sang Bombo Radyo kay Engineer Arecio Casing, Jr., Regional Director sang National Economic Development Authority (NEDA) Region 6, iya ginpahayag nga ang tikang ang isa ka complementary agud nga mapasanyog ang duha nga rehiyon ilabi na sa patag sang ekonomiya.
Suno kay Casing, mangin progresibo ang Western Visayas kag bilang isa ka rehiyon ang Negros Island Region bangud maka-focus na ang isa kag isa sa pagpauswag sa sektor sang turismo, serbisyo, kag ekonomiya.
Ginpahayag man ni Casing nga may kinaiya nga kusog ang mga rehiyon kun ipabugal ang mga tourist destination, kaaangay na lamang sa patag sang Tourism Industry sang Western Visayas bangud may yara sang Boracay kag beaches sa Northern Iloilo, samtang sa Negros Island naman, amo ang Mt. Kanlaon, Apo Island, kag Dumaguete City.
Ginalanataw naman sang natungdan nga dapat i-improve sang tagsa ka mga rehiyon ang patag sang serbisyo, sa diin, mangin dako nga bulig kun matigayon nga mahuman ang Panay-Guimaras-Negros Bridge, Negros to Guimaras Bridge, Negros to Cebu kag Cebu-Bohol-Leyte Bridge.
Kun mahuman ini, tuman ka dako ang illa mangin bulig sa isa kag isa, ilabi na connectivity nga posible makahimo sang mataas nga growth sang ekonomiya sa kabug-usan sang Visayas.
Apang, ginakasubo naman sang Department of Tourism (DOT) Region 6 ang pagseparar sang Negros Occidental sa Western Visayas bangud nangin dako ini nga palaagyan sa pagdala sang madamo nga turista.
Suno kay Crisanta Marlene Rodriguez, Director sang Department of Tourism Region 6, iya ginpahayag nga santo sa data, may 5 million ka mga turista ang nagpadulong sa Western Visayas sang tinalikdan nga tuig.
Ginhatagan naman sang importansya sang natungdan ang nangin ambag sang Negros Occidental sa rehiyon bangud sa naghatag ini sang dako nga impact sa kultura sa patag sang pagkaon kag turismo.
