ILOILO CITY- Ginpat-ud sang National Economic and Development Authority nga nagapatuman ang gobyerno sang crucial interventions agud suportahan ang pinaka-vulnerable nga mga sektor kag mapasiguro ang food security sa tunga sang La Niña kag mas mataas nga inflation nga na-record sang Hulyo.
Una na ginreport sang Philippine Statistics Authority (PSA) nga ang inflation naglab-ot sa 4.4 percent sang Hulyo kag mas mataas sa 3.7 percent sang Hunyo 2024.
Ang increase ang resulta sang mas mataas nga inflation sa food kag non-food items, amo man sa housing prices, utilities, gatong, karne, mais, kag prutas.
Suno kay National Statistician Dennis Mapa,ang food inflation nagtimbuok sa 6.7 percent halin sa 6.5 percent sang Hunyo.
Pahayag ni Mapa,ang mga weather disasters sang damlag lang ang nag-apekto sa agricultural commodities kag nag-contribute sa mas mataas nga presyo sang ulutanon.
Una na ginpahayag sang National Economic and Development Authority nga ginlunsar sang Department of Agriculture ang Rice-for-All Program agud mapamag-an ang palas-anon sa nagataas nga presyo sang bugas.
Sa idalom sang programa, ang bugas ang ibaligya sa P45 per kilo sa selected Kadiwa centers.
Bilang preparasyon naman sa La Niña, ginpasiguro sang ahensya ang availability sang quick response fund, assistance, credit, kag seed buffer stock.
Ginpadasig man ang declogging sang farm drainage systems kag construction sang water-impounding projects kag post-harvest facilities.
Maga-provide naman ang Agriculture department sang kapin P510 million sa fuel subsidies sa crop, livestock, kag poultry farmers.
Ini ginapanan-aw nga makabenepisyo sa 160,000 farmers kun sa diin may batunon sila nga masobra P3,000 nga fuel assistance sa tunga-tunga sang Agusto kag Septyembre.
