Ginpahayag ni National Economic and Development Authority (NEDA) Secretary Arsenio Balisacan nga daku ang tyansa nga malab-ot sang Pilipinas ang upper-middle income economy status sa masunod nga tuig.
Suno kay Balisacan, yara pa subong ang pungsod sa kategorya nga lower middle-income economy sa idalom sang bag-o nga klasipikasyon sang World Bank.
Yara sa sulod sang bracket para sa lower middle-income economies ang gross national income (GNI) per capita sang pungsod nga $3,950 sang 2022.
Para sa fiscal year 2024, ginlaragway sang World Bank ang low-income economies nga may GNI per capita na $1,135 ukon mas manubo pa sang 2022; lower middle-income economies ang may GNI per capita sa tunga-tunga sang $1,136 kag $4,465; upper middle-income economies ang may GNI per capita nga $4,466 at $13,845; kag high-income economies ang may GNI per capita nga $13,845 o mas mataas pa.
Upod sang Pilipinas subong sa lower-middle income bracket ang Vietnam, Laos, Cambodia, kag Myanmar.
Ang kaiping nga mga pungsod nga yara sa upper-middle income level amo ang Malaysia, Thailand, kag ang Indonesia nga nagsaka ang kategorya subong nga tuig halin anay sa lower-middle income status.
Yara sa pinakamataas nga status ukon high-income bracket ang Singapore kag Brunei.
Suno kay Balisacan, antes malab-ot ini nga status, kinahanglan nga malab-ot anay ang growth target subong nga tuig kag ipabilin ang growth trajectory sa 2025. Importante man suno sa natungdan nga indi magluya ang balor sang Philippine peso sa currencies sang major trading partners.
“Attaining this status will require that we achieve our growth target this year, that we maintain our growth trajectory in 2025, and our currency will not weaken significantly relative to the currencies of our major trading partners,” suno kay Balisacan sa latest press conference.
Isa man sa major target sang gobyerno suno sa natungdan amo nga mapanubo sa single digit ang nationwide poverty pag-abot sang 2028.
Sang 2023, yara sa 15.5% ang poverty rate sang Pilipinas nga mas manubo halin sa 18.1% sang 2021.#
(Jam Sta Rosa/AFP/Getty Images)
