Pormal na nga gin-anunsyo sang European Union kag Pilipinas ang pagbalik sang negosasyon para sa free trade agreement nga posible magasugod na subong nga tuig.
Ginpahibalo ini nanday Department of Trade and Industry (DTI) Secretary Alfredo Pascual kag European Commission (EC) executive vice president Valdis Dombrovskis sa joint press briefing sa Brussels, Belgium.
Suno kay Dombrovskis, ang kasugtanan sa tunga sang Pilipinas kag European Union ang pat-od nga magapasaka sang bilateral trade sang tubtub sa 6 billion euros ukon ginabanta P363.3-billion.
Ang EU amo ang ikaapat nga pinakadaku nga trading partner sang Pilipinas kag daku man nga source sang foreign direct investments nga lab-ot sa 13.7 billion euros ukon P829.4-billion sang 2021.
Nahibaluan nga may mga diskusyon agud ipatigayon ang free trade agreement sang 2015 sang tion ni anay President Benigno Aquino, apang wala na nasugpunan pa sang Duterte administration bangud nagbilin sang malain nga marka ang drug war sa relasyon sang Pilipinas sa West kag nagsugod man ang international investigation.
Importante ini nga agreement bangud kasugtanan ini agud mabuhinan ang problema sa imports kag exports.
Sa idalom sang free trade policy, ang mga produkto kag serbisyo ang mahimo mabakal kag mabaligya sa iban nga mga pungsod nga may gamay lamang ukon wala gid sang government tariffs, quotas, subsidies, ukon prohibitions.
