CALINOG, ILOILO – Arestado ang isa ka negosyante matapos nakuhaan sang indi lisensyado nga mga armas luthang sa kaugalingon nga balay sa Calinog, Iloilo.
Ang arestado ang ginkilala sa Joel Rivera Alimagno, 55, kasado sang Brgy. Poblacion Delgado, Calinog, Iloilo, tag-iya sang hardware store.
Nakuha sang joint elements sang Provincial Special Operations Group kag Calinog PNP paagi sa search warrant ang mga masunod:
1 ka .22 caliber rifle
2 ka .45 caliber pistol
1 ka taurus PT92 caliber 9mm
1 ka .38 caliber revolver
2 ka magazine sang .45 caliber pistol
1 ka magazine sang PT92 caliber 9mm
5 ka cartridges sang .45 caliber pistol
6 ka live cartridges sang PT92 caliber 9mm
3 ka live cartridges sang 12 gauge shotgun
Sa interview sang Bombo Radyo kay Police Major Jonathan Pinuela, pinuno sang Provincial Special Operations Group, iya ginpahayag nga may yara sang naghatag sang tip nga may yara sang indi lisensyado nga mga armas luthang si Alimagno.
Suno kay Pinuela, ginpanginwala ni Alimagno nga may yara siya sang ginapanag-iyahan nga mga armas luthang apang sang ginpatigayon nga search operation, ginpahayag sang tiayon nga nagabulig gid lamang sila sa mga kubos.
Ginpahayag ni Pinuela nga 1987 pa sang nagsugod sa pagbaton sang ginaprenda nga armas luthang si Alimagno kag sa tion nga indi makuha ukon magawad, iya na lang ini nga ginabakal.
Sa subong, yara sa kustodiya sang Calinog PNP si Alimagno kag magapangatubang sang kaso nga paglapas sa Republic Act 10591 ukon Comprehensive Law on Firearms and Ammunition.
Ang recoveries naman ang yara sa Provincial Special Operations Group kag natalana nga dal-on sa headquarters.
