LA PAZ, ILOILO CITY – Nagapangatubang sang sampaw-sampaw nga kaso ang isa ka negosyante nga nagabaligya sang critically endangered nga mga pispis matapos nadakpan sa ginpatigayon nga entrapment operation sa Jereos Street, La Paz, Iloilo City.
Ini amo si Franz Leonard Esposo Orbista, residente sang Barangay San Nicolas, Oton, Iloilo.
Sa interview sang Bombo Radyo kay Police Major Janvier Gilza, chief sang Iloilo Maritime Police Station, iya ginpahayag nga natigayon ang operasyon kaupod ang Department of Environment and Natural Resources (DENR).
Suno kay Gilza, nagpatigayon sila sang transaction kay Gilza nga magbakal sang parrot balor P15,000.
Sang nadaho na ang kwarta, diri kag gin-aresto ini.
Natigayon pa gid nga makuha sa van sini ang 14 ka dugang mga mga critically endangered nga mga pispis nga ginalakipan sang mga masunod:
3 ka Walden’s Hornbills
5 ka Visayan Tarictic Hornbills
6 ka Colasisi Green Racket-Tail Parrots
Yara naman subong sa paghinakop sang DENR ang mga critically endangered nga pispis.
Lakip sa mga kaso sini amo ang paglapas sa Section 27, Paragraph E sang Republic Act 9147 ukon Wildlife Resources Conservation and Protection Act of 2001 kag Republic Act 10175 ukon Cybercrime Prevention Act of 2012.
Ginpahayag man sang arestado nga ginakuha sini ang mga pispis sa iya wala ginpangalanan nga supplier sa Antique.
