Patay ang isa ka negosyante samtang nasamaran ang asawa matapos mabungguan sang truck ang ila motorsiklo sa Hacienda Esperanza, Barangay Poblacion 1, Sagay City, Negros Occidental.
Ang napatay amo si Reynaldo Pantol, 31 anyos samtang pilason naman si Analyn Pantol, 29 anyos, lunsay residente sang Barangay Vito, Sagay City.
Ang driver sang truck amo si Christopher Villacerin, 31 anyos, kag residente sang Barangay Rafael-Bararera, Sagay City, Negros Occidental.
Sa interview sang Bombo Radyo kay Police Lt Col. Alvimar Flores, hepe sang Sagay City Police Station, ang involved sa aksidente amo ang isa ka Honda Click nga motorsiklo kag JMC truck.
Halin sa Sagay City Proper kag padulong sa Escalante City ang mga ini.
Suno kay Flores, ang motorsiklo nga ginasakyan sang mag-asawa ang paliko apang gulpyada man nga nagliko ang truck gani nagluntad ang aksidente.
Desidido ang asawa nga magpasaka sang kaso batok sa driver sang truck.
Gin-inquest naman ang suspek kun sa diin magapangatubang ini sang kaso nga reckless imprudence resulting to homicide, physical injury kag damage to property.
