BAROTAC NUEVO, ILOILO – Padayon ang imbestigasyon sang Barotac Nuevo Municipal Police Station sa motibo sa pagluthang patay sa 60 anyos nga lalaki sang Brgy. Lico-an sa nasambit nga banwa.
Ang biktima amo si Efren Hechanova samtang ang suspek naman amo si Ernie Bragancia, 53.
Sa interview sang Bombo Radyo kay Police Major Ramil Sarona, hepe sang Barotac Neuvo PNP, iya ginpahayag nga nagpadulong ang biktima sa isa ka tyangge agud nga magsukot sang iya ginapautang nga karne.
Samtang nagapungko si Efren saguwa sang tiyangge, gilayon nga nag-abot ang suspek sa lugar kag gintiro ang biktima.
Pilas sa likod nga bahin sang ulo ang naangkon ni Efren.
Suno kay Sarona, mahimo nga may daan nga hiligut-anon ang suspek sa biktima.
Nakit-an sa lugar ang anom ka mga basiyo sang bala nga ginapatihan iya sang .45 caliber pistol.
Gindala pa sa ospital ang biktima apang gindeklara ini nga dead on arrival.
Sa subong, wala pa matigayon nga madakpan ang suspek.
