Gin-institutionalize na ang ordinansa nga Negosyo Development Academy ukon NDA nga anay Uswag Negosyo Academy nga ginkwestyon ni Iloilo City Councilor Sheen Marie Mabilog.
Suno kay Mabilog, ginakabig sini nga dako nga bulig sa mga pumuluyo sang syudad ang nasambit nga programa, apang, indi dapat mangin limitasyon ang pangalan sini para lamang sa mga kabahin sang Uswag team and supporters.
Pahayag pa ni Mabilog nga dapat sundon ang DILG Memorandum Circular No. 2026-006 ukon Anti-Epal Drive sang Department of Interior and Local Government (DILG) agud nga mangin neutral kag indi maghatag sang impression sa publiko nga iya lamang ini programa sang grupo.
Nahibaluan nga nag-alokar sang 2 milyon pesos ang NDA para sa inisyal nga pondo kag magahatag naman sang P5,000 nga financial assistance para sa mga kwalipikado nga graduates sa Iloilo City.
Nagpasalig naman si Iloilo City Mayor Raisa Treñas nga pirmahan niya ang nasambit nga ordinansa sa tion nga maglab-ot sa iya talatapan, kasunod sang pag-aprubar sang 12th Sangguniang Panlungsod sa third kag final reading, kahapon, Setyembre 23.
Sa idalom sang programa, ang qualified graduates mahimo makabaton sang P5,000 nga financial assistance bilang dugang nga kapital sa ila negosyo, samtang may training man sa business development, financial management, digital marketing, mentoring, business registration kag iban pa nga praktikal nga aspeto sang pagpatukod kag pagpalapad sang negosyo.
Ginpunto ni Councilor Miguel Treñas, co-author sang ordinansa nga Negosyo Development Academy nga importante nga may permanente nga programa ang Iloilo City Government para sa mga aspiring kag existing entrepreneurs.
Ini agud indi magdepende ang pumuluyo sa kung sin-o ang nagapungko nga administrasyon.
Nahibaluan nga target sang NDA nga mabuligan ang micro, small and medium enterprises (MSMEs), kag mga Ilonggo nga luyag magsugod sang kaugalingon nga negosyo.
Sa matandaan nga sang Setyembre 15, ginpatigayon ang ikaduha nga session sang Batch 29 sang NDA nga nagatutok sa marketing, productivity kag visual merchandising.
Paagi sa institutionalization sang programa, ginalauman nga magapadayon ang training, mentoring kag paghatag sang financial assistance para sa mga Ilonggo.
