ILOILO– Gina tudlo nga ginahalinan sang ilegal nga droga sa Western Visayas amo ang Cebu kag Negros.
Sa interview sang Bombo Radyo kay Pol.Lt.Col Joem Malong tagpamababa sang Police Regional Office 6, iya ginpahayag nga wala pa napat-ud ang matuod nga source sang mga ilegal nga droga nga naga sulod sa Western Visayas apang base man sa mga impormasyon nga ila nakuha sa pagpatigayon nila sang mga drug buy operations masami nga gina tudlo sang mga durugista amo ang Cebu kag Negros.
Suno kay Malong, ila man paga tsekyaron kun matuod man nga lakip ang New Bilibid Prison sa lugar kun sa diin nagahalin ang mga ilegal nga droga nga naga sulod sa probinsya.
Ginpabugal naman sang PRO 6 nga isa ang Western Visayas sa mga probinsya nga wala sang drug laboratory ukon marijuana plantation.
Ginpahayag ni Malong nga isa sa rason kun ngaa padayon sa gihapon nga naga taas ang kaso sang mga naga patigayon sang ilegal nga buluhaton paagi sa pag gamit kag pagbaligya sang ilegal nga droga amo bangud dako ang kwarta nga gina kita nila paagi sa pagbaligya sini.
