ILOILO CITY – Gintudlo sang isa sa mga suspek si Negros Oriental Third District Representative Arnulfo “Arnie” Teves nga amo ang mastermind sa kamatayon ni Governor Roel Degamo.
Sa isa ka ambush interview, ginpahayag sang isa ka suspek nga gintanyagan sila nga magtrabaho bilang security aide sang isa ka VIP.
Ginpahayag man niya nga wala sila nakahibalo nga si Governor Degamo ang ila nga target.
Sa briefing sa ila, isa ka dako nga drug lord kag sindikato ang ila nga patyon.
Nakahanda man ang mga ini nga magkooperar sa otoridad para sa imbestigasyon.
Sa subong, ang duha ka mga suspek ang yara na sa idalom sang Department of Justice.
Una na nga ginpahayag ni Teves nga wala sang kuhaon nga benepisyo ang iya pamilya kun ipapatay nila si Degamo.
Kung madumduman, sang Marso 4, ginsulod ang compound ni Governor Degamo sa banwa sang Pamplona sang grupo sang kalalakinhan kag ginpatay ang gobernador.
Lakip man sa napatay ang walo ka iban pa nga yara man sa lugar sang natabo ang krimen.
