Gin-akusahan ni United States president Joe Biden ang iya kaalyado nga si Israeli Prime Minister Benjamin Netanyahu nga wala sang bastante nga ginahimo para nga malab-ot na ang kasugtanan nga mahilway ang mga bihag sang Hamas sa Gaza.
Ginpahayag ini ni Biden sang nag-atubang sila ni Vice President Kamala Harris sa US negotiators para matigayon ang hostage-release deal matapos nakumpirma nga may anum ka dugang nga mga bihag sa Gaza lakip na ang isa ka American citizen.
Suno sa presidente, “tuman na kalapit” ang negotiators sa pinal nga proposal nga amo ang ipresentar sa atubang sang Israel kag Hamas militants..
Nahibaluan nga binulan na nga ginatulod sang US kag mediators halin sa Egypt kag Qatar ang pagbayluhanay sang preso kag mga bihag sa Gaza amo man ang pagpatigayon sang ceasefire sa gyera.
Matandaan nga 251 ka mga bihag ang gindala sang militante sa Gaza matapos nag-atake sa southern Israel sang Oktubre 2023 apang 97 pa diri ang nagapabilin sa Gaza Strip kun sa diin 33 sa ila ang bangkay na suno sa Israeli military.
Sa pagtimalos sang Israel sa amo nga atake, masobra na sa 40,700 ang napatay sa Gaza Strip nga kadam-an mga sibilyan, kabataan, kag kababainhan suno sa UN human rights office.
