Magabalik na naman ang gyera sa Gaza.
Ini matapos nagmandu si Prime Minister Benjamin Netanyahu sa Israeli military nga mag-atake na naman sa amo nga lugar sa Palestine. Suno sa iya, kasunod ini sang ginhimo sang Hamas nga paglapas sa ceasefire.
Una na nga ginpahayag sang Israeli military officials nga nag-atake ang Hamas sa pwersa sang Israel sa Rafah sa area sang Gaza nga yara pa kuntani sa idalom sang control sang Israel. Nauna man nga nag-akusar si Netanyahu nga wala nagsunod ang Hamas sa ceasefire sang naghatag sila sang lain nga bangkay samtang gina-turn-over sa Israel ang lawas sang mga bihag.
Suno sa prime minister, ang parte sang lawas nga ginhatag sang Hamas amo ang iya sang isa ka hostage nga na-recover na sang pwersa sang Israel sa Gaza halos duha ka tuig na ang nakaligad.
Nagsabat naman ang Hamas nga nagasunod sila sa nakasugtan nga ceasefire apang nagapangita lang si Netanyahu sang rason agud nga palagyuhan ang obligasyon sa idalom sang ila kuntani nga nakasugtan.
Matandaan nga Oktubre 10 sang ginpatuman ang ceasefire paagi sa pagpatunga sang Estados Unidos sang Amerika.
Duha ka tuig ang gyera sa amo nga lugar sa Palestine nga nag-umpisa sang Oktubre 7, 2023. Base sa health authorities sa Gaza, 68,000 ka tawo ang kumpirmado nga patay bangud sa pagpamomba sang Israel kag linibo ang missing sa sulod sang duha ka tuig nga may gyera.#
