Ginalantaw nga mas magabudlay ang energy situation sa Pilipinas bangud sang padayon nga pagsarurot ang balor sang Philippine peso batok sa US Dollar.
Panibag-o nga record low ang narekord kahapon samtang padayon ang krisis sa Middle East.
Nagsirado ang trading nga P60.30 ang baylo sang US dollar nga mas manubo pa sa nauna na-record nga P60.10 sang Huwebes.
Sa kabug-usan subong nga bulan, masobra na sa 4% ang ginpierde sang peso.
Ginalantaw nga mas mabudlayan ang Pilipinas bangud kun magluya ang peso, mas magamahal ang pagbakal sang langis bangud dolyar ang ginagamit sa purchase. Gina-import sang Pilipinas ang masobra 90% sang langis.
Kun magtaas ini, ginalantaw man nga magadasig pa ang inflation, gani nga nabutang man sa mabudlay nga sitwasyon ang Bangko Sentral ng Pilipinas kaangot sa interest rate hikes.
Una na nga nagpaandam ang head sang International Energy Agency nga ang krisis nga nag-umpisa sa gyera sang US, Israel, kag Iran ang maghimo maglapaw pa sa combined shock sang 1970s oil crises kag disruption dala sang 2022 invasion sang Russia sa Ukraine.#
