ILOILO CITY – Ipaidalom sa 14 ka adlaw nga istrikto nga facility quarantine ang tanan nga locally stranded individuals (LSIs) nga magapauli sa syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga indi na pagpahanugutan ang home quarantine bangud sang nagataas nga numero sang nagalapas sa home quarantine protocol.
Ginkadismaya sang alkalde ang balita nga may yara sang naka-home quarantine nga mga LSIs nga nagagwa kag mag-basketball, mag-inum-inom, magpa-manicure, magpa-party, kag maghimo sang iban pa nga aktibidad nga nagapataas sa risgo sang transmission sang coronavirus disease 2019 (COVID-19).
Para sa mga LSIs nga indi makasaho sa gindesignar nga quarantine facility sang syudad, mahimo sila makapaidalom sa hotel quarantine sa kondisyon nga sila ang magabayad.
“MANDATORY RT-PCR TEST”
Indi naman maggamit sang rapid test kits ang syudad sang Iloilo para sa mga Locally Stranded Individuals (LSIs).
Suno kay Mayor Treñas, ang tanan nga magaabot nga LSIs ang ipaidalom sa reverse transcription polymerase chain reaction (RT-PCR) test para sa conclusive nga resulta.
Dapat nga patapuson suno sa alkalde ang 14-day quarantine apisar mag-gwa na ang resulta sang swab test.
Nagpasalig man ang natungdan nga may yara pa sang bastante nga suplay sang RT-PCR test kits ang Iloilo City Government.
Ang rapid test kits naman suno kay Treñas ang mahimo gamiton para sa mass testing program.
