ILOILO CITY — Nanindugan ang New Masinloc Fishermen Association nga magapadayon sila sa pagpangisda sa West Philippine Sea sa pihak sang regulasyon sang China nga dakpon ang kun sin-o man nga foreign national ang makasulod sa ginaagawan nga teritoryo.
Suno kay Leonardo Cuaresma, presidente sang Zambales-based association, iya ginpahayag nga ginakondenar sang asosasyon ang tikang nga ginaduso sang China bangud pagpangisda lamang ang ginahimo sang mga Filipino fisherman kag wala sang ano man nga “trespassing” nga nagakatabo.
Ginpahayag man ni Cuaresma nga wala sang basehan ang China agud ipatuman ang amo nga tikang bangud wala sang ano man nga ginalapas ang mga Pilipino nga manugpangisda sa layi kaangay na lamang sang pagpang-bully kag pagpang-harass sa mga Chinese nationals.
Gin-athag man sini nga nakahibalo ang mga Filipino nga yara sila sa kaugalingon nga teritoryo sang pungsod Pilipinas sa diin wala sang kinamatarong ang China nga ipatuman ang amo nga tikang.
Ang kontrobersyal nga regulasyon sang Beijing ang epektibo sa bulan sang Hunyo nga nagapahanugot sa China Coast Guard nga dakpon ang mga trespassers kag i-detain sa indi magnubo sa 60 days.
Kun balikan, ang Scarborough Shoal nga nahamtang 124 nautical miles nakatundan sang Zambales kag yara sa 200-nautical mile exclusive economic zone (EEZ) sang pungsod ang gina-angkon sang China.
Sa pihak sini, preparado naman ang New Masinloc Fishermen Association sa pag-aresto sang China batok sa ila nga mga manugpangisda sa diin naghingyo ini sa gobyerno sang Pilipinas nga mag-deploy sang mas madamo nga patrol vessels sa West Philippine Sea agud mag-patrol.
Una naman nga ginpahayag ni President Ferdinand Marcos Jr. ang iya pagkondenar sa regulasyon sang China bangud indi ini patas para sa mga Filipino.
