ILOILO CITY – Amat-amat na nga ginapatuman sang Police Regional Office 6 ang panibag-o nga PNP Localization Program nga ginaduso ni Philippine National Police Chief General Camilo Cascolan.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga santo sa pahayag sang PNP Chief, ang Localization Program amo ang transfer with corresponding replacement ukon swapping of personnel.
Suno kay Malong, madamo sang ginakonsiderar sa nasambit nga programa kag isa na diri ang kagustuhan mismo sang natungdan nga pulis, rangko kag ang numero sang mga police personnel sa tagsa ka lugar.
Ginpahayag ni Malong nga sa bahin sang Western Visayas, ginapatuman na ang nasambit nga mandu kag ginalauman nga ini ang makapataas sang morale kag isa man ini sa factor agud mangin epektibo sa trabaho ang isa ka pulis.
Ini bangud nga sa baylo nga mapahilayo sa pamilya, may kahigayunan na ang tagsa ka pulis nga ma-assign sa ila lugar ukon sa pinakamalapit nga police station kun sa diin sila naga-istar.
Kun tuhoy naman sa 8 hours nga duty schedule, ginpahayag sang PRO6 spokesperson nga nakadepende ini sa sitwasyon sang lugar kag sa numero sang mga naka-assign nga personnel.
