Mas nagluya pa ang balor sang Philippine Peso batok sa US Dollar samtang nagalala ang epekto sa global market nga resulta na sang giyera sa Middle East.
Nagtakop ang trading kahapon, Marso 16, nga P59.87 ang baylo sang kada US dollar nga amo ang bag-o nga historic low ukon pinakamaluya nga balor sang Philippine Peso sa bilog nga maragtas sang pungsod.
Antes sini, nagbukas sa 59.71 ang local currency, kag nakalab-ot pa ang trading kahapon sa 59.95 antes ang pagsira sini sa P59.87.
Antes sang gyera sa Middle East nga nag-umpisa sang Pebrero 28, nakabangon-bangon pa ang Peso sa P57.665 sang Pebrero 27 nga amo man ang katapusan nga adlaw sang trading antes nag-ibwal ang tensyon.
Sandig sa report sang Bloomberg, nag-intervene na ang Bangko Sentral ng Pilipinas (BSP) sa currency market paagi sa pagbaligya sang dollars agud nga madepensahan ang peso antes pa ini magluya pa gid kag makalab-ot sa 60-to-the-dollar level.
Kun nagaluya ang balor sang peso, mas naga-kumplikado pa ang sitwasyon sa enerhiya sa Pilipinas bangud nagamahal ang imported goods lakip na ang langis bangud gina-purchase ang langis paagi sa dolyar.
Magluwas diri, bangud man sang pagluya sang peso, may impact man ini sa utang sang Pilipinas, ilabi na nga one-third sang amo nga utang ang naghalin sa foreign creditors ukon mga manugpautang halin sa luwas sang pungsod.
Una na nga ginsiling ni President Ferdinand Marcos Jr. nga indi sini luyag nga makalapaw ang peso sa 60 pesos sa kada isa ka dolyar, bangud kun magluya ang balor sang Peso, pat-od nga magatimbuok na naman ang balayran sa utang.#
