Nabulsa sang Filipino Olympic pole vaulter nga si EJ Obiena ang bulawan nga medalya sa International Springer-Meeting sa Cottbus, Germany.
Ini man ang panibag-o nga season best ni Obiena.
Gindeklarar siya nga gold medalist patas kay Menno Vloon sang Netherlands matapos pareho nga nakalukso sang 5.77-meters.
Sandig sa website sang meet, kinahanglan ang jump-off agud nga madesisyunan kun sin-o sa ila ang kampyon, apang sang ulihi, pareho man sila nga wala nakalampas sa 5.84m sa pareho nga attempts.
Ini ang una nga tion sa maragtas sang Cottbus nga duha ka mga atleta ang gindeklarar sa una nga pwesto.
Nagpangatlo naman ang American pole vaulter kag defending champion nga si Sam Kendricks matapos nalukso ang 5.77m sa sulod sang tatlo ka attempts.
Matandaan nga sang nagligad nga semana, nabulsa man ni Obiena ang bronze medal sa 6th ISTAF Indoor Dusseldorf sa amo man nga pungsod. Sa amo nga tournament, naangkon sini ang 5.65-meter clearance.#
