Nadakpan na ang suspek nga nagsunog sa isa ka babaye nga ginaalegar nagakatulog lamang sa subway car sa Brooklyn, New York sa Estados Unidos sang Amerika.
Gin-identify ang lalaki nga si Sebastian Zapeta-Calil, 33, isa ka Guatemalan citizen nga iligal nga nagsulod sa US sa nagligad nga anum ka tuig base sa rekord sang US Immigration and Customs Enforcement.
Base sa imbestigasyon sang pulis, natabo ang brutal nga krimen 7:30 sang aga (local time).
Wala sang tinimok-timok ang suspek sang ginpalapitan sini ang biktima kag ginsindihan ang iya panapton tubtub nga nagkarab-karab ang lawas sini pila ka segundos lang ang nagligad.
Base sa surveillance video, nagpungko pa ang suspek sa station bench kag ginlantaw ang babaye nga masunog tubtub nga nag-abot ang mga pulis. Nakita pa mismo sa body-worn cameras ang maathag nga itsura sang killer suno sa New York Police Department.
Walo ka oras ang nagligad, naaresto ini sa isa ka subway station sa Manhattan sa bulig sang teenagers nga nag-report sa otoridad. Yara na ini subong sa kustodiya sang otoridad kag napasakaan sang reklamo nga first-degree murder kag arson.
Wala pa sang ginpaguwa nga detalye kun ano ang motibo sini.
Ginpaiway man nga isapubliko mangin ang identity sang biktima. Base sa inisyal nga report sang pulis, ginapatihan nga indi man magkilalahay ang duha antes ang insidente.
Nahibaluan nga sang natabo ini nga insidente, naka-“Code Blue” ang syudad kun sa diin may dugang nga resources kag shelter nga gina-deploy para mabuligan ang mga natugnawan ilabi na ang mga homeless ukon wala sang puluy-an nga masami nagapaligad na lamang sang adlaw kag gab-i sa subway system sa tion nga malain ang tiyempo.
