NEW YORK – Matuod ang mga naga guwa nga balita nga ginahaboy sa Hart Island sa Bronx, New York City ang mga bangkay nga wala may naga kuha ukon mga undocumented.
Ang mga bangkay amo ang mga nagkalamatay bangud sa Coronavirus Disease 2019.
Sa report ni Bombo International Correspondent Alex Vidal direkta sa New York, iya ginpahayag nga naghimo siya sang ocular visit sa kontrobersyal nga Gerard J. Neufeld Funeral Home bangud malapit lang ini sa iya ginatiniran agud nga mahibaluan kun bala matuod nga madamo sang mga bangkay ang nagapabilin sa punerarya.
Sang ginpadulongan ni Vidal ang punerarya, nakit-an niya ang madamo nga bangkay sa sulod sang mga hulot sang punerarya sa Elmhurst sa diin tag 25 ka bangkay ang kada isa ka kwarto.
Ang mga bangkay nga nagatumpok ang inug cremate apang ang iban nga bangkay nga indi matatapan ang ginahakot kag ginasakay sa funeral car kag ginadul-ong sa isa ka lugar nga ginasuspetsahan amo ang sa Hart Island.
Suno kay Vidal, ginabutang mismo sa box ang mga bangkay indi kaangay sa nakit-an niya sang tinalikdan nga bulan nga ginpangtumpok lang ang mga bangkay sa sulod sang refrigerated truck.
Sa subong, nakarekord sang pinakamanubo nga death toll ang New York humalin sang Marso 28 sa diin naglab-ot lang ini sa 226 ka mga nagkalamatay indi kaangay sadto nga wala naganubo sa 500 kada adlaw ang mga ginabawian sang kabuhi bangud sa COVID-19.
Samtang 30% naman sa mga Amerikano ang nagapati sa pahayag ni US President Donald Trump nga naghalin sa isa ka laboratory sa Wuhan China ang nasambit nga virus.
