ILOILO CITY – Ginpasalamatan sang Department of Agriculture ang flagship station ng Bombo Radyo Philippines bangud sa suporta nga ginahatag sa ahensya subong nga tuig 2020.
Sa exclusive interview sang Bombo Radyo kay Mr. James Earl Ogatis, Regional Information Officer sang Department of Agriculture Region 6, iya ginpahayag nga dako ang nangin papel sang Bombo Radyo Iloilo sa pagpalapnag sang mga impormasyon kaangot sa sektor sang agrikultura.
Suno kay Ogatis, pinaagi sa Bombo Radyo, napalab-ot sa mga mangunguma ang mga impormasyon sa pihak ang ginpangatubang nga pandemya.
Ginpahayag ni Ogatis nga mismo si Engr. Remelyn Recoter, Regional Executive Director sang Department of Agriculture Region 6 ang nagakilala sa papel sang media kaangay sang Bombo Radyo Iloilo sa madasig nga pagpalab-ot sang ihibalo sa mga mangunguma ilabi na nga indi man tanan nga lugar ang ila makadtuan.
“Nagapati gid ang aton departamento sa pagpamuno sang aton Regional Executive Director nga si Engr. Remelyn Recoter kag sa aton Secretary nga si William Dar sa rolyo sang radio station sa pagpatuman naton sang programa kag mga aktibidades para sa mga mangunguma sa Western Visayas.”
Kadungan sang ginpatigayon nga Media Pasasalamat suno kay Ogatis, ginhatagan sang pasidungog ang Bombo Radyo Philippines.
“Nagahiwat kita sang Media Pasasalamat sa mga partners naton bilang pagkilala sa nahimo nga pagsuporta sa programa sa pihak sang COVID-19 pandemic.”
Samtang, ginpasalamatan man sang Department of Agriculture ang suporta nga ginahatag sang News Director sang Bombo Radyo Iloilo sa pagdala sang mga balita sang ahensya.
Suno kay Ogatis, sa tagsa ka mga aktibidad kag press conference sang ahensya, masami nga present si Bombo Chris Jan Hechanova Lozada rason nga ginkilala siya bilang Most Supportive Agricultural Reporter for Radio sa bug-os nga Western Visayas.
“Si Bombo Chris Jan Lozada amo gid pirme ang naga-upod sa amon. Isa lang ka pagpahibalo namon, present gid siya sa mga aktibidades,” pahayag ni Ogatis.
Isa sa mga criteria suno kay Ogatis sa paghatag sang Agricultural Radio Reporter’s Award amo ang wala untat nga paghatag sang suporta sa programa, serbisyo kag advocacy sang Department of Agriculture.
Ini ang rason suno kay Ogatis kun ngaa napilian nila si Bombo Chris Jan Hechanova Lozada agud hatagan sang pagkilala.
“Isa sa mga criteria sa paghatag naton sang pagpasidungog sa iya amo man ang presensya ni Bombo Chris Jan Lozada sa tagsa naton ka mga press conference kag mga aktibidades nga ginahiwat sa patag sang agrikultura,” dugang pa sang natungdan.
Nahibaluan nga sang nagligad nga tuig, ginkilala man sang Department of Agriculture ang News Director sang Bombo Radyo bilang Most Supportive Agricultural Reporter for Radio.
