𝗜𝗟𝗢𝗜𝗟𝗢 𝗖𝗜𝗧𝗬 – Mahimo na nga magpagwa ang National Food Authority (NFA) sang buffer stocks sang bugas.
Ini matapos gindeklarar na ni Agriculture Secretary Francisco Tiu Laurel Jr. ang food security emergency agud nga masolusyunan ang padayon kag indi kinaandan nga pagsaka sa presyo sang bugas sa mga merkado.
Sa interview sang Bombo Radyo kay Jasmine Lintag, Regional Manager sang NFA Region 6, iya ginpahayag nga ang mga buffer stocks nga bugas ang mahimo na nga ibaligya sa mga local government units (LGU).
Sa idalom sang Department Circular No. 03, ginatugutan na ang pag-release sang stocks nga yara sa NFA agud nga ma-stabilize ang presyo kag masiguro nga masarangan kag accessible para sa mga Pinoy ang bugas.
Suno kay Lintag, sa Western Visayas, lakip sa mga LGU nga nagpabutyag sang interes nga magbakal sang ila buffer stocks amo ang Iloilo City kag Negros Occidental.
Apang kada bulan, may yara lang sang specific nga allocation sang sako sang bugas ang kada LGU sa diin sa Iloilo City, 7,500 lang ang mahimo mabakal kada bulan kag 42,500 naman nga sako sa Negros Occidental.
Ginabaligya sang NFA ang kada kilogram sang bugas sa P33.00 kag mahimo naman ini mabaligya sang mga LGU sa P35.00 kada kilogram.
Ginpasigurado man ang natungdan nga maayo ang kaledad sang ila ibaligya nga bugas.
Nahibaluan nga ginhimo sang Department of Agriculture ang ang food security emergency sa tunga sang “extraordinary” nga pagtaas sang presyo sang local nga bugas, nga nagapadayon sa pihak sang mas manubo nga gastos sa world market kag pagbuhin sa mga taripa.
Magapabilin naman ang food security emergency tubtob magbalik sa mayo ang sitwasyon.
