Nagaplano ang National Food Authority (NFA) Region VI nga magbakal sang 13 ka mga truck para sa masunod nga tuig.
Tuyo sini nga tikang nga malab-ot ang malayo ukon maligwin nga mga lugar kag madasig kag direkta nga makabakal sang humay sa mga mangunguma.
Sa ginhiwat nga pagtilipon sang mga asosasyon sang mga mangunguma sa Iloilo, ginpaathag ni Dr. Glenda Paz, branch manager sang NFA Iloilo Branch, nga pamatuod ini nga wala nagakatulog ang ahensya kundi ginasabat ang kinahanglanon sang mga mangunguma.
May tatlo man ka mga daku nga bodega nga ginpatukod sa Jaro, Iloilo City kag mga banwa sang Dumangas kag Dueñas sa idalom sang Masagana Agri-Food Infrastructure Modernization program ukon MAFIM.
Ini nga programa ang ginhimo paagi sa kolaborasyon sang NFA kag Department of Agriculture (DA) agud mangin moderno ang agricultural infrastructure para nga mapataas ang productivity, mabuhinan ang pyerde sa post-harvest, kag ma-improve ang food security.
Magluwas diri suno kay Paz, may iga-dugang pa nga proyekto sa Quinto Distrito agud nga mas madamo nga mga mangunguma ang malab-ot sang serbisyo sang NFA sa Panay.
Una na nga ginklaro sang ahensya nga wala sila nag-untat sa pagpamakal sang humay halin sa mga lokal nga mangunguma, apang limitado ang kapasidad bangud puno na ang mga warehouse kag kulang sa dryer equipment.
(Photo: DA Website)
