ILOILO CITY – Kulang ang supply sang NFA rice diri sa Western Visayas kag mangin sa bug-os nga pungsod.
Ini ang rason suno sa National Food Authority (NFA) kun nga-a wala sang NFA rice nga makita subong sa mga merkado.
Sa interview sang Bombo Radyo, ginpahayag ni NFA-6 director Angel Imperial nga sa karon 40,000 lang ka bag ang stock sang NFA para sa Iloilo.
Bangud nga kulang suno kay Imperial, prayoridad ang buffer stock sang ahensiya nga ginatigana para sa kalamidad ilabi na nga tiyempo sang tag-ululan.
Ini ang rason suno kay Imperial nga wala sang ginabaligya nga NFA rice sa mga merkado.
Naatrasar suno sa NFA regional director ang pag-abot sang parte sang Western Visayas gikan sa gin-import nga bugas sang ahensiya.
May 160,000 ka sako nga ginapaabot ang rehiyon apang wala pa mapapanaug sa barko nga yara sa Bacolod bangud sang mala-in nga tiyempo.