ILOILO CITY – Gindula sang National Food Authority (NFA) ang kahangawa sang publiko sa kakulangan sang supply sang bugas sa pungsod.
Sa interview sang Bombo Radyo Iloilo, ginpahayag ni NFA Region 6 director Rex Estoperez nga tubtob lang sa walo ka adlaw ang buffer stock sang ahensiya nga malayo sa ginasaad sang regulasyon nga dapat makaigo sa 15 ka adlaw ang buffer stock sang NFA.
Suno kay Estoperez, ang buffer stock ang gamiton lang sa tagsa may kalamidad kag kun magtaas ang presyo sang commercial rice.
Dugang pa sang opisyal, bastante ang supply sang bugas sa Pilipinas partikular sa Western Visayas nga isa sa nagapanguna nga naga-supply sang bugas sa pungsod.
Sa kabug-usan suno sa opisyal, halos 500,000 na ka sako sang bugas ang napanagtag sang NFA Western Visayas kun sa diin tig-P100,000 ka sako ang nagkadto sa Region 3, Region 4, Region 5 kag Region 11, samtang 22,000 naman para sa Region 8.
Gin-ako ni Estoperez nga ang away nanday Cabinet Secretary Leoncio Evasco Jr. kag NFA administrator Jason Aquino, ang rason sa buffer stock sang ahensiya.
May miscommunication suno kay Estoperez sa ahensiya matapos nga akusaran ni Evasco sang kurapsyon ang NFA administrator.