ILOILO CITY – Nagpasalig ang National Food Authority Region VI nga indi maka-apekto ang pagnubo sang buffer stock sang bugas sa presyo sang commercial rice sa mga merkado.
Ini ang kasunod sang report sang ahensya nga nagnubo ang minimum inventory requirement agud nga makabulig sa mga emerhensya kag kalamidad.
Ang buffer stock rice amo ang bugas nga ginbakal kag gin-store sa isa ka lugar samtang manami pa ang pag-harvest agud nga malikawan ang pagnubo sang presyo sini.
Ini ang ginapagwa sa tion nga mahina ang pag-ani ilabi na kun may bagyo kag apektado ang sektor sang agrikultura kag malikawan ang pagsaka sang presyo sang bugas.
Sa interview sang Bombo Radyo kay Dianne A. Silva, Regional Manager II sang National Food Authority Region VI, iya ginpahayag nga wala sila sang kontrol sa commercial prices sang bugas.
Suno sa iya, ang commercial sector ang nagakontrol sa presyo sini bangud nga wala sila sang regulatory function.
Pahayag niya dugang, maswerte ang Western Visayas bangud nga madamo pa sang stock sang bugas para sa mga kalamidad bangud sa malapad nga production area sini.
Santo sa data sang ahensya, may yara sang 77,907 bags nga humay nga kun magaling na, may yara sang gina-bulubanta nga 50,000 bags nga bugas.
Ini ang magluwas pa sa 42,000 bags para sa bilog nga rehiyon.
Nahibaluan nga ang buffer stock sang National Food Authority ang gina-distribute sa panahon sang kalamidad, kag nagahatag man sila sa Department of Social Welfare and Development, Bureau of Jail Management and Penology, relief agencies kag mga local government units.
