Atensyon sa mga FUR-parents.
Daw ano bala kasadya nga apisar wala ikaw sang dala nga pasalubong sa imo pagpauli apang ang imo presensya ang bastante na sa imo hinuptanan nga ido?
Sa imo pagbukas pa lang sang pwertahan, makita mo na ang nagatumbo-tumbo, malipayon, excited kag naga iwol-iwol nga ikog sang imo nga ido.
Di bala ang imo hinuptanan nga ido ang nagahatag sang pagpalangga kag companionship sa imo kabuhi?
Apang maka-protekta ayhan ang imo furry friend sa imo batuk sa heart disease kag makapalawig sang imo kabuhi?
Santu sa pagtuon sang American Heart Association, ang mga tawo nga may hinuptanan nga ido ang makapanubo sang risgo nga makaangkon sang balatian sa tagipusuon kag makapalawig pa sang imo nga kabuhi.
Suno kay Dr. Thomas Lee, isa ka cardiologist kag professor sang medicine sa Harvard Medical School, nagapa-aktibo sa isa ka tawo ang pag-angkon sang ido.
Ginarekomenda sang eksperto nga kun mahimo, mag lakat-lakat kaupod ang imo ido bangud isa pa ini ka pamaagi nga ikaw ang maka-exercise.
Ang mga ido ang nagapabuhin man sang imo nga stress kag pagkasubo.
Sila ang mahimo mo nga mangin kaupod ilabi na kun ikaw na lang isa ang nagapangabuhi.
Apang pahanumdom man sa mga tag-iya sang ido, kadungan sang pagsagod sa isa ka sapat, dapat man nga mangin responsable ikaw sa pagtatap sang imo hinuptanan.
