May mga pilas nga wala nagaayo.
Masami nga ginaangot naton ini nga mga tinaga sa mga naagyan nga kasakit sa paghigugma ukon pag-abyanay ukon anuman nga malain nga eksperyensya sa kabuhi, apang may literal gid nga pilas sa imo lawas nga indi mo dapat pagpabay-an ilabi na kun malawig na ini nga wala nagaayo.
Suno kay Dr. Christi Cavaliere, Medical Director sang Wound Care sa Cleveland, Ohio, ini nga chronic wound ang posible magatuga sang mas delikado nga komplikasyon.
Ang chronic wound suno kay Cavaliere ang nagaumpisa lang nga kaangay kagamay sang scratch ukon daw punggod apang nagalala nga nagalala kag wala na nagakipot.
Posible nga naangot ini sa diabetic ulcers, venous leg ulcers kag pressure ulcers.
Suno naman kay Dr. Bruce Ruben, Founder kag Medical Director sang Encompass HealthCare, isa ka outpatient facility nga naga-feature sang advanced wound care, posible man nga maangot ang wala nagaayo nga pilas sa: Poor Circulation, Infection, Edema ukon fluid nga nagatipon sa panit, dermis ukon fatty tissue nga masami nagakatabo sa lower extremities, Inadequate Nutrition, kag sulit-sulit nga trauma sa pilas.
Suhestyon sang mga medical experts, likawi gid ang paggamit sang anti-inflammatory drugs, magkaon gid sang maayo, ilakip ang vitamin C sa imo diet, i-dress ang imo pilas, maghimo sang regular exercise bangud ginapaayo sini ang imo blood flow, kag indi gid magpanigarilyo.
Labaw sa tanan,importante gid nga magpakonsulta sa doktor kun may pilas ka nga amo sini.
