750 lang ka swab sample ang sarang ma-cater sang Philippine Genome Center sa sulod sang isa ka semana rason nga masobra isa pa ka bulan sang naggwa ang resulta nga may delta variant sang COVID-19 sa Western Visayas.
Ang duha ka local cases sang amo nga variant amo ang mag-asawa nga taga-Pandan, Antique.
Una na nga ginkumpirma ni Antique Governor Rhodora Cadiao nga napatay ang infected nga asawa, samtang nakarecover naman ang bana.
Sa interview sang Bombo Radyo kay Dr. Bea Camille Natalaray, designated spokesperson sang DOH Region VI, iya ginpahayag nga Mayo 29 pa gin-test ang mag-asawa.
Gin-send sa Philippine Genome Center ang ila swab sample sang nagligad nga Hunyo 11 apang Hulyo 15 sang hapon pa sang naggwa ang resulta.
Hulyo 16, nag-inform na sa local government unit kag ginpatigayon ang contact tracing.
Magluwas sa mahinay nga resulta, ginapraoyoridad suno kay Natalaray ang mga swab samples sang mga returning overseas Filipinos nga halin sa mga pungsod nga apektado sang lain lain nga variant sang COVID-19.
Nahibaluan nga ini nga duha ka kaso nga delta COVID-19 variant amo ang isa sa gintumod rason sang national government kun ngaa ginpasaka sa Enhanced Community Quarantine (ECQ) ang Iloilo City kag Iloilo Province tubtob sa Hulyo 31.
