Gintawag ni Presidential Spokesperson Atty. Harry Roque nga “pinakamagahod nga kritiko” ni Presidente Rodrigo Duterte si Vice President Leni Robredo.
Ginlaslasan niya ang bise presidente matapos nagpabutyag sang kahandaan nga mag-upod kay Duterte sa isa ka infomercial agud nga ma-engganyo ang madamo nga mga Filipinos nga magpabakuna batuk sa COVID-19.
Suno kay Roque, subong nga napakita sang administrasyon nga madamo na ang nabakunahan, gilayon lang nga nagboluntaryo kag luyag na nga magpakita sa infomercial si Vice President Robredo.
Pahayag niya, desisyon sang presidente sa gihapon ang masunod apang tun-an ini sang presidente kun ano ang mangin kontribusyon sang iya nga kritiko.
Wala naman sang kumento si Presidente Duterte sa nangin pahayag ni Roque.
Apang indi man si Robredo ang naghatag sang ideya tuhoy sa infomercial kaupod ang presidente kundi amo si Senator Joel Villanueva nga nagduso nga ipaguwa sa publiko ang infomercial sa diin makit-an ang duha ka mga top officials sang pungsod agud mapasangkad pa ang kumpiyansa sang mga tawo.
