Nagapangayo sang bulig ang National Grid Corporation of the Philippines ukon NGCP sa gobyerno agud mapadasig ang pagpangita sang lugar agud nga makapatukod sang mga bag-o nga power plant para masolbar ang kakulang sang power supply sa Visayas.
Sa interview sang Bombo Radyo kay Atty. Cynthia Alabanza, Assistant Vice President for Public Relations and spokesperson sang NGCP, iya ginpahayag nga kinahanglan sang masobra 150 megawatts nga dugang nga baseload capacity agud masolusyonan ang problema sa mga power interruptions.
Suno kay Atty. Alabanza, madamo sa mga power plant nga yara sa Visayas ang dugay na nga na-outage, samtang ang pila sa mas dalagko nga planta ang na-outline kag ginapaabot nga makabalik sa operasyon.
Pagpaathag niya, kon makabalik ini, mahimo nga mag-normalize ang supply kag madula ang mga alert, apang indi ini igo para maghatag sang dugang nga reserve sa mas malawig nga tion.
Pahayag pa niya, ang pagbalik sang mga planta mahimo lamang makahatag sang tion para makapangita sang short-term solutions, amo man ang makaplano sang pagpatukod sang mga bag-o nga planta nga mahimo maglab-ot sang lima tubtob pito ka tuig antes matapos.
Bangud sini, ginapanawagan sang NGCP ang suporta sang gobyerno kag publiko, ilabi na sa pagpatuman sa mga proyekto nga kinahanglan para sa power supply, lakip ang mga power plant, transmission lines kag substations.
Dugang pa ni Atty. Alabanza, kinahanglan man ang community acceptance kag kooperasyon sang mga pumoluyo kag landowners, bangud ang pagpatukod sang mga transmission projects mahimo magkinahanglan sang paggamit sang mga pribado nga property.
