ILOILO CITY – Nagmandu na si Presidente Ferdinand “Bongbong” Marcos, Jr. sa National Grid Corporation of the Philippines nga gilayon nga i-address ang power crisis sa pungsod nga nagresulta sang lapnagon nga blackout sa isla sang Panay, Guimaras kag Negros.
Ini ang ginpahibalo ni Department of Engery Sec. Raphael Perpetuo Lotilla kay Iloilo Governor Arthur Defensor Jr.
Matandaan nga sang Abril 29, Sabado nga adlaw, ginsapol ni Governor Defensor ang Department of Energy, National Grid Corporation of the Philippines, Energy Regulatory Commisssion kag local officials sa diin gin-istoryahan ang tatlo ka adlaw nga power interruption.
Sa interview sang Bombo Radyo kay Gov. Defensor, iya ginpahayag nga ginasiguro sang Presidente nga gina-monitor niya ang mga tikang nga ginahimo sang NGCP.
Suno kay Defensor, may dugang nga mandu si Presidente Marcos sa National Grid Corporation of the Philippines nga mangin transparent kag padayon nga i-update sang regular ang mga local officials, distribution utilities, power generators, Department of Energy kag ang Energy Regulatory Commission sa status sang Visayas grid.
Bangud sini, maga-convene ang gobernador sa Provincial Disaster Risk Reduction and Management Council kag sa Provincial Civil Defense Cluster sa Mayo 2 agud nga mahatagan gilayon sang tikang ang mga instructions kag impormaayon agud masolusyonan ang power crisis.
Dugang pa ni Defensor, nagsiling si President Marcos sa National Grid Corporation of the Philippines nga siguruhon nga indi na maliwat pa ang lapnagon nga blackout.
Magluwas sina, dapat man nga matapos na sang koporasyon sa third stage ang Cebu-Negros-Panay backbone project (CNP3) kun sa diin naga-link ang Negros kag Cebu sa overhead line nagikan sa Bacolod City padulong sa San Carlos City kag Toledo City, Cebu pinaagi sa submarine cable.
Ang bug-os nga Cebu-Negros-Panay project nagalakip sang construction sang 238km long circuit, 230kV capacity transmission line nga naga-link sa tatlo ka mga isla sang Cebu, Negros kag Panay, sa diin ginalakipan sang Barotac Viejo substation, E.B Magalona cable terminal station kag Bacolod substation.
Ginpahayag man sang gobernador nga ginmanduan pa gid sang Presidente ang National Grid Corporation of the Philippines nga i-review ang reliability sang tagsa ka mga Visayas sub-grids kag i-fast tract ang signing sang Ancillary Service Procurement Agreement kaupod sa Energy Regulatory Commission.
Ang ancillary services ang nagasuporta sa transmission sang power halin sa generators padulong sa consumers agud nga mapabilin ang reliable operations kag kinahanglanon gid sa pag-manage sang power fluctuations.
