Ginpasigurado sang National Grid Corporation of the Philippines (NGCP) nga wala sang may magaluntad nga power interruption sa tion sang 2025 midterm elections.
Sa interview sang Bombo Radyo kay Reaghan Alcantara, Lead Specialist sang NGCP, iya ginpahayag nga nagsugod suspendi ang tanan nga maintenance activities sang NGCP sang Mayo 5, 2025, kasunod sang contingency plans nga gintalana sang Commission on Elections (COMELEC) para sa palaabuton nga national and local elections sa Mayo 12.
Suno kay Alcantara, ang construction kag non-critical maintenance activities malapit sa mga substations kag transmission lines ang temporaryo nga suspendido man sugod sang Mayo 5 nga magalawig tubtob Mayo 16, 2025.
Ginpahayag man sini nga contingency measures nga gintalana sang NGCP ang magasunod sa timeline nga gintalana sang COMELEC sa idalom sang Resolution No. 10999 nga nagamando sang calendar of activities and prohibited acts kaangot sa national election.
Sa idalom sang Resolution No. 11055 nga napetsahan Septyembre 2024, ini ang nagatalana sang nagkalainlain nga papel sang mga ahensya sa pagpasiguro sang malinong kag masaligan nga pagpatigayon sang mid-term elections.
Sa piyak sini, nakahanda man ang talatapan sa tion sang emerhensya kaangay na lamang kon may magluntad nga power interruption sa adlaw mismo sang eleksyon.
Dugang sini nga may Quick Response Team ang NGCP agud nga magresponde sa area of concern.
Nahibaluan nga ang NGCP magasugd sang ila 24/7 nga operasyon sa Overall Command Center sugod sa Mayo 11 tubtob sa Mayo 14 partikular ang System Operations (SO) kag Operations and Maintenance (O&M), magapabilin nga ‘fully’ nga may mga tinawo kag naga-operate.
