Nagpatuman sang manual load dropping ang National Grid Corporation of the Philippines (NGCP) kahapon nga adlaw bangod sa kakulangan sang generation supply sang kuryente.
Sa interview sang Bombo Radyo kay Raegahn Alcantara, lead specialist sang NGCP, ginpahayag sini nga kulang ang available generation capacity gani kinahanglan nila nga magpatuman sang manual load dropping agud maproteheran ang kabug-osan nga power grid.
Suno kay Alcantara, ang problema naghalin sa mga unplanned outages kag limited availability sang iban nga power plants.
Pahayag pa ni Alcantara, kun makabalik gilayon sa normal nga operasyon ang iban pa nga planta, mahimo na liwat nga mangin stable ang supply sang kuryente kag malikawan ang mga power interruption.
Nagpabutyag naman sang pagkabalaka ang NGCP sa mga nagapalupad sang borador nga likawan ina sa mga lugar nga may ara sang kuryente bangud nga mahimo ini nga magresulta sa power interruption.
Suno kay Alcantara, may mga insidente nga ang borador ang nangin rason sang pagkapatay sang kuryente gani padayon ang ila kampanya kontra kite flying malapit sa mga transmission lines.
Padayon naman nga ginabantayan sang NGCP ang kahimtangan sang power supply sa Western Visayas agud malikawan ang mas malawig pa nga mga power interruptions.
