MANILA – Ginpasigurado sang National Grid Corporation of the Philippines (NGCP) nga wala na sang ibatak nga red kag yellow alerts sa nabilin nga bahin sang 2024.
Suno kay Cynthia Alabanza, spokesperson sang NGCP, iya ginpahayag nga sa tion nga mainit ang tyempo, mabaskog ang konsumo sang kuryente gani dapat nga bastante ang kuryente sa transmission system.
“For 2024, wala tayong nakikitang karagdagang alert so far,” pahayag ni Alabanza.
“Kapag mainit ang panahon, mas malakas ang konsumo ng kuryente. Dahil umuulan na, hindi na mataas ang konsumo ng tao kaya dapat sapat na ang kuryenteng dumadaloy sa transmission system,” dugang pa ni Alabanza.
Ginabatak ang yellow alerts sa tion nga magnubo ang operating margin kun ipaanggid sa kinahanglan nga lebel agud mapun-an ang contingency requirement sang transmission grid.
Samtang, ginabatak naman ang red alert sa tion nga kulang ang power supply agud tupungan ang consumer demand kag regulatory requirements sang transmission grid.
Humalin sang Abril tubtob sa pag-umpisa sang Hunyo sa diin nabatyagan ang mainit nga tyempo nga ginpalala pa sang El Niño, nakabatak ang power grid sang 11 ka red alerts kag 31 ka yellow alerts sa Luzon grid.
Ginbatak naman sang grid operator ang walo ka red kag 26 ka yellow alerts sa Visayas grid.
Wala naman sang red alerts, apang may duha ka yellow alerts sa Mindanao grid.
“Kapag walang maraming planta ang pumalya within the year, dapat wala tayong makitang alert status,” dugang pa sang opisyal.
