Kon may magtaliwan nga miyembro sang pamilya, ginahatagan gid naton sang importansya ang mga handumanan nga ila ginbilin sa aton.
Halin sa baul, bayo, picture, alahas kag ano pa nga butang nga rason agud sila ang aton dumdomon.
Apang suksukon mo ayhan ang isa ka alahas kon ang pendant kag gin-gamit nga materyal diri amo ang iya ngipon.
Didto sa Australia, may isa ka alahera ukon jeweller nga kilala bangud sa iya pinasahi nga pamaagi sang paghimo sang mga commemorative nga mga alahas nga may nakabutang nga ngipon sang nagtaliwan nga himata.
Siya amo si Jacqui Williams, 29, tag-iya sang Grave Metallum Jewellery.
Sadto isa siya ka hardinero sa isa ka patyo apang sang ulihi, nangin isa ka full time nga alahera apang indi ordinaryo ang iya mga ginahimo.
Gina-offer niya sa iya mga kliyente kon interesado sila nga magpahimo sang alahas nga may buhok ukon ngipon sang ila nagtaliwan nga himata bilang remembrance kag madamo man ang nagkainteres diri.
Suno kay Jacqui, ini ang iya pamaagi agud makabulig sa nabatyagan nga kalisod sang mga tawo nga napatyan sang miyembro sang pamilya.
Ang tagsa ka alahas nagalawig sang tubtob 2 ka bulan antes matapos kag nagabalor sang ($10,000 AUD) ukon 374,461.94 pesos.
