ILOILO CITY- Positibo ang National Irrigation Administration Region 6 nga mangin operational na ang Jalaur River Multipurpose Project Stage II sa tunga-tunga sang tuig 2025.
Sa interview sang Bombo Radyo kay Mr. Steve Cordero, Chief/ Designated Spokesperson sang Jalaur River Multipurpose Project Watershed Management, iya ginpahayag nga ginakalipay sang National Irrigation Administration nga gin-aprubahan ni Pres. Ferdinand Marcos Jr. nga amo man ang chair sang National Economic and Development Administration (NEDA) Board ang dugang nga P8.48 billion para sa restructuring sang Jalaur River Multipurpose Project Stage II.
Ang original cost sang proyekto ang yara sa P11.2 billion sang ginpirmahan sang ahensya kag sang contractor nga Daewoo Engineering and Construction ang kontrata sang Septyembre 3, 2018.
Sa P11.2 billion, P8.9 billion ang gin-loan halin sa Export-Import Bank of Korea samtang ang nabilin nga P2.3 billion ang ginsabat sang national government.
Suno kay Cordero, nag- request ang contractor bangud sa pagtaas sang presyo tuga sang inflation nga nakaapekto sa presyohanay sang materyales kag labor.
Pahayag niya, magluwas sa inflation, nakaapekto man ang exchange rate bangud ang official currency sa loan amo ang US dollars.
P43 pa lang ang exchange rate kabaylo sang isa ka US dollar sang naaprubahan ang loan apang sang tion nga ginpatuman ini, naglab-ot na sa masobra P50 ang baylo..
Ang request para sa dugang nga pondo ang naaprubahan pa sang Hulyo 19 apang padayon pa nga nagahulat ang ahensya sa official resolution.
Dugang pa ni Cordero, ang physical accomplishment sang proyekto ang yara na sa 68.56 percent complete.
