ILOILO – Nagakadapat nga hatagan sang second chance ukon ika duha nga kahigayunan ang mga pulis nga naangot sa illegal drugs.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga pito ka active police officer sa Western Visayas ang naangot sa illegal drugs sa diin apat na ang ginpaidalom sa monitoring sang Regional Adjudication Board.
Suno kay Malong, malawig ang adjudication process agud nga mahibalu-an kun matuod ukon indi ang akusayson batok sa ginadudahan nga pulis.
Ginpahayag ni Malong nga pagkatapos sang imbestigasyon sang Regional Adjudication Board, ila nga igapasa sa Regional Director ang impormasyon kag ang Regional Director naman ang magapasa sang impormasyon sa headquarters sang Philippine National Police.
Ang National Adjudiction Board suno kay Malong ang magapatigayon man sang kaugalingon nga imbestigasyon agud nga mapat-ud ang impormasyon nga nakuha sang Regional Adjudication Board.
Sa tion nga mapamatud-an nga wala sang kaangtanan sa illegal drugs ang ginadudahan nga pulis, ini ang igabalik sa serbisyo samtang pahalinon kag pasakaan sang nagakaigo nga kaso ang mga pulis nga mapamatud-an nga guilty.
