ILOILO CITY – Nagpasar sang isa ka hagna si Negros Oriental Representative Arnolfo Teves Jr. nga naga-ilis sang pangalan sang Ninoy Aquino International Airport (NAIA).
Sa House Bill No.610, ginaduso ni Teves nga islan ini sa Ferdinand E. Marcos International Airport.
Suno sa iya, nagakadapat nga ipangalan ini sa anay presidente bangud nga gintukod ini sa iya termino.
Sang 1987, ang Manila International Airport (MIA) ang ginpangalanan liwat sa Ninoy Aquino International Airport (NAIA) pinaagi sa Republic Act No. 6639 sang termino ni anay presidente Cory Aquino.
Ini ang ginpangalanan sa anay senador kag opposition leader Benigno “Ninoy” Aquino Jr. nga ginpatay sa nasambit nga airport sang nagpauli ini sa pungsod sang Agosto 21, 1983.
Suno pa kay Teves, nagakadapat lang nga pangalanan ini sa tawo nga naghatag kag nagbilin sang legasiya nga nagbutang sa Pilipinas bilang sentro sang international kag domestic air travel nga amo ang nag-institute kag nag-conceptualize sang proyekto nga nangin bugal sang aton pungsod.
Nagpanwagan man ini kay Presidente Ferdinand Marcos, Jr. nga pamatud-an nga sa tion sang inyo termino, matupungan niya ukon malabawan ang iya amay.
Si Marcos, Sr. ang pinakamaayo nga presidente sang Pilipinas suno kay Teves.
Mayo subong nga tuig, ang NAIA ang gintumod nga world’s worst airport for business class travelers santo sa pagtuon nga ginpatigayon sang American luggage app nga Bounce.
Apang, kun basehan ang history, suno sa Manila International Airport Authority website, ang NAIA ang isa ka anay US Air Force base tubtob sang 1948 antes gin-turn over sa National Airport Corporation.
Sang gindula ang National Airport Corporation sang 1951, ang pagpanag-iya kag pagdumala sang airport ang ginhatag sa Civil Aeronautics Administration (CAA) sa idalom sang Department of Commerce & Industry.
Sang 1956, ang CAA ang ginhalin sa Department of Public Works, Transportation & Communications.
Ang una nga 13 ka tuig sang airport ang nangin infrastructure para sa international flights.
Ang international runway kag taxiway ang gintukod sang 1953 kag natapos sang 1961 ang control tower kag terminal building para sa exclusive use sang international passengers sa southwest intersection sang mga runway.
Ini ang gintawag na sadto nga Manila International Airport.
Sang 1972, gin-promulgate ni Marcos, Sr. ang Executive Order No. 381 nga nagapahanugot sa development sang Manila International Airport (MIA).
Si Marcos, Sr. ang nagpungko bilang presidente sang 1965.
