Nagpanugyan ang National Meat Inspection Service (NMIS) sa publiko nga mangin maid-id kag mahinalungon sa pagbakal sang karne kasunod sang narekord nga kaso sang African Swine Fever ukon ASF sa pila ka mga lugar sa pungsod.
Sa interview sang Bombo Radyo kay Dr. April Chavez, OIC-Regional Technical Director sang NMIS Region 6, iya ginpahayag nga tuman ka importante nga magbakal lamang sang karne gikan sa mga lehitimo nga balaklan kag meat establishments nga may nagakaigo nga meat inspection certificate kag insakto nga marka agud masiguro nga nag-agi ini sa inspeksyon kag safe kaunon.
Suno kay Chavez, dapat man lantawon sang mga bumalakal ang kondisyon sang karne, kalakip na ang duag, baho, kag katinlo, kag siguraduhon nga maayo ang pagtago kag temperatura sang mga chilled kag frozen meat products.
Nagpaandam man ini batok sa pagbakal sang karne gikan sa mga indi otorisado nga nagabaligya kag online sellers nga wala sang nagakaigo nga permit kag inspection certificate.
Paathag sang ahensya, apisar indi makalalaton sa tao ang ASF, ang indi husto nga pagbakal, transportasyon, kag pag-dispose sang kontaminado nga pork products ang mahimo nga magdulot sang padayon nga paglapta sang sakit sa mga ginasagod nga baboy kag magpalala sang halit sa industriya.
Gin-engganyo sang NMIS ang publiko nga mangin kabahin sang pagpugong sa ASF paagi sa responsable nga pagbakal sang karne kag pagsunod sa mga guidelines sa meat safety.
 sa publiko nga mangin maid-id kag mahinalungon sa pagbakal sang karne.){kind=link}