ILOILO CITY – Arestado ang number 1 most wanted person sang banwa sang Ajuy, Iloilo bangud sa kaso nga rape.
Ang suspek amo si Rommel Bañes, 30, residente sang Barangay Progreso, Ajuy, Iloilo.
Ini ang gin-aresto sa Iloilo International Airport sa banwa sang Cabatuan.
Sa interview sang Bombo Radyo kay Police Staff Sergeant John Cesar Bantigue, imbestigador sang Ajuy Municipal Police Station, iya ginpahayag nga sang 2017, ginpasakaan sang kaso nga rape si Bañes upod sa isa pa ka suspek bangud sa paghimulos sa isa ka bata sa ila man nga barangay.
Nagpalagyo ini sa Metro Manila kag subong lamang nga tuig nakabalik sa Iloilo.
Sa subong, preso na ini sa Ajuy Municipal Police Station kag wala sang pyansa nga ginrekomendar para sa iya temporaryo nga kahilwayan.
