ILOILO CITY – Ginkasubo sang nagpanguna sa 2018 Physician Licensure Examination ang ginapangatubang subong nga kotrobersiya sang Department of Health (DOH) may kaangtanan sa Dengvaxia vaccine.
Sa exclusive interview sang Bombo Radyo Iloilo kay Dr. Jerald Lalaguna Pelayo sang Masbate, ginpahayag sini nga bilang isa ka health professional, masubo panumdumon nga nadulaan na sang pagsalig ang publiko sa DOH.
Suno kay Pelayo, kuntani malampuwasan ini sang DOH kag mabalik ang pagsalig sang publiko agud indi mabutang sa alang-alang ang ikaayong lawas sang kadam-an.
Kanugon suno kay Pelayo sang mga health program sang DOH kun wala sang gana ang publiko nga magpakigbahin.
Ginpahayag man ni Pelayo nga sa ti-on nga matapos na ang iya residency program sa Internal Medicine kag specialization sa Neurology, luyag sini gihapon magserbe sa kaangay sini nga mga Pilipino ilabi na sa mga pigado sa iya dutang natawhan nga Masbate.