ILOILO CITY – Sundon man sang MORE Electric and Power Corporation (MORE Power) ang no-disconnection policy para sa lifeliners.
Ang extension sang no-disconnection policy ang ginduso sang Department of Energy (DOE) kag gin-aprubahan ni Presidente Rodrigo Duterte agud mahatagan ligwa ang mga pigado nga mga pumuluyo sa ila electric bill subong nga may COVID-19 pandemic.
Ang ginatumod nga lifeliners sa idalom sang MORE Power amo ang mga low-income households nga may 95 kilowatts hour consumption per month ukon mas manubo pa.
Sa interview sang Bombo Radyo kay Atty. Allana Mae Babayen-on, legal counsel sang MORE Power, iya ginpahayag nga indi pag-utdan sang kuryente ang tanan nga lifeline electricity consumers nga may due date sa ila electric bill sa Marso 2021.
Apang, paathag ni Babayen-on, wala ini nagakahulugan nga libre ang suplay sang kuryente.
Ginaprayoridad lang sang gobyerno ang consumer welfare subong nga may pandemya, apang suno sa natungdan, mas maayo gid nga amat-amaton ang pagbayad sang electric bill agud nga indi magtingob ang balayran.
Sa subong, santo sa rough estimate ni Atty. Babayen-on, kapin 21,000 ang lifeliners sa syudad sang Iloilo.
Kun mabalay na ang payment scheme, igabalhag man ini sa website sang MORE Power.
