ALIMODIAN, ILOILO – Ipatuman na umpisa buwas nga adlaw, Hunyo 30, ang ‘No ECQ Pass, No Travel Policy’ kasunod sang pagpatuman sang Enhanced Community Quarantine sa Alimodian, Iloilo.
Sa interview sang Bombo Radyo kay Mayor Gefree ‘Calay’ Alonsabe, iya ginpahayag nga maga-umpisa 12:00 karon sa kaagahon, nag-epekto na ang Enhanced Community Quarantine kasunod sang 13 ka kumpirmado nga kaso sang COVID-19.
Suno kay Alonsabe, ipatuman ang quarantine protocol kasubong sang ECQ Pass sa tion nga magguwa sa balay, pagpatuman sang border checkpoint, pagdumili sa mga naga-edad 20 anyos panubo lakip na sa mga senior citizens nga magguwa sa balay, mandatory nga pagsuksok sang facemask kag pagsunod sa physical distancing kun yara sa mga pampubliko nga lugar.
Ginpahayag ni Alonsabe nga ang iya ginbasehan amo ang Executive Order nga ginsunod sang yara pa sadto sa Enhanced Community Quarantine ang bug-os nga probinsya sang Iloilo.
