Posible nga istrikto nga ipatuman sang gobyerno ang “no home quarantine” protocol para sa mga pasyente nga infected sang coronavirus disease 2019 (COVID-19).
Suno kay Department of the Interior and Local Government (DILG) Secretary Eduardo Año, ginaduso ang amo nga lihok agud malikawan ang paglapta sang virus apang natalana pa ini nga aprubahan sang COVID-19 Inter-Agency Task Force.
Suno kay Año, amyendaran ang joint memorandum circular sa tunga sang Department of Health kag sang Department of Interior and Local Government.
Ginpaathag man sang tiglikom nga tuman ka importante nga kuhaon ang mga pasyente sa sulod sang balay kag dal-on sa isolation facility agud indi na malatnan pa sang COVID-19 ang iban nga miyembro sang pamilya.
May mga gintukod naman suno sa opisyal nga quarantine facilities sa pungsod kag ini ang magluwas pa sa mga hotel nga nagaserbe man nga isolation centers.
Sa pihak sini, nagpasalig si Año nga hatagan man sang konsiderasyon ang mga pasyente kun may yara sila sang bastante nga rason kun ngaa padayunon lang ang quarantine sa sulod sang balay.
Wala pa sang timeframe para sa approval sang IATF apang nagalaum si AñO nga madesisyunan na ini subong nga semana.
Ini nga proposal ang ginasuportahan man ni COVID-19 National Task Force chief implementer Carlito Galvez.#
