ILOILO – Tuman ka emosyonal ang mga tawo sa Estados Unidos matapos ang kamatayon sang black american nga si George Floyd sa Minneapolis sa Minnesota, USA.
Suno kay Bombo International Correspondent Alex Vidal, ginakabalak-an subong sang mga otoridad ang posible liwat nga pagluntad sang mga hublag protesta.
Suno kay Vidal, naglawig sang halos lima ka adlaw ang ginpatigayon nga sunod-sunod nga hublag protesta sang mga black americans kag iban pa sa diin ginasinggit nila ang tinaga nga ‘I can’t breathe’ nga amo ang ulihi nga tinaga ni Floyd antes napatay.
Lakip man sa ginasinggit sang mga nagaprotesta amo ang ‘No Justice, No Peace’ agud ipakigbato ang kinamatarong sang black people.
Ginaplano subong nga magpadala sang halos 2,000 ka dugang nga National Guards agud magbulig sa pagbantay sa Minneapolis.
