ILOILO – Desidido sa gihapon si Iloilo City Mayor Jerry Treñas nga ipasaka sa National Inter-Agency Task Force ang complaint batok sa Bureau of Fire Protection (BFP) Region 6.
Ini apisar gin-relieve na sa pwesto si anay Regional Director F/SSUPT Roderick P. Aguto subong nga adlaw, Hunyo 17.
Sa interview sang Bombo Radyo kay Treñas, iya ginpahayag nga bag-o pa lang niya nahibaluan nga gin-relieve na ang nasambit nga opisyal.
Apang suno kay Treñas indi niya pagpalampason ang kontrobersiya may kaangtanan sa pagpositibo sa COVID-19 sang isa ka personnel sang BFP Region 6 nga ginpahayag nga nagpanglugayawan pa sa Boracay kag gintago pa sang ahensya ang pila ka importante nga impormasyon tuhoy sa iya.
Subong nga adlaw, Hunyo 18, ginalauman man ni Treñas nga igasumite na ni Iloilo City Police Office (ICPO) Director Pol. Col. Eric Dampal ang police investigation report nga amo ang mangin basehan sang ipasaka nga complaint sang alkalde.
Sa bahin naman sang pagdesignar kay Fire SSupt Jerry Candido bilang bag-o nga Officer-in-Charge sang BFP-6, ginpahayag ni Treñas nga nagalaum siya nga indi na masulit pa ang “shenanigans” sang pamunuan.
Suno kay Treñas, kilala niya sang personal ang bag-o nga OIC bangud naka-agi man ini nga nagserbe bilang Iloilo City Fire Marshal kag diri gid mismo sa syudad nagdaku kag nagtuon.
Suno kay Treñas, “very competent” nga klase sang opisyal si Candido.
