ILOILO – Ginahatagan anay sang plaso sang Iloilo Police Provincial Office ang mga motorista nga wala pa nakakuha sang plaka gikan sa Land Transportation Office.
Ini ang may kanagtanan sa ginapatuman nga “No Plate, No Travel” policy bilang isa ka paagi agud nga mapanubo ukon malikawan ang disgrasya sa dalan kun sa diin sang nagligad nga tuig, naglab-ot sa 139 ang napatay bangud sa vehicular accident.
Sa interview sang Bombo Radyo kay Police Staff Sergeant Francisco Lindero, tagpamaba sang Iloilo Police Provincial Office, iya ginpahayag nga kun wala pa nahatag sang Land Transportation Office 6 ang plaka, ang driver ang kinahanglan nga magpakita sang dukomento bilang pamatuod.
Suno kay Lindero, magluwas sa “No Plate, No Travel” policy, ginapasangkad man ang pagpangdakop sa mga driver nga wala nagasuksok sang helmet kag wala sang lisensya.
Ginpahayag ni Lindero nga sa subong, may mga checkpoint nga ginpahamtang sa probinsya sang Iloilo bilang kabahin sang security measures para sa Dinagyang Festival 2020 agud nga makumpiska ang mga kontrabando nga tuyo pasudlon sa syudad sang Iloilo.
